సిరిదొలంకెడి

సిరిదొలంకెడి పగలూచీకటా యితడేమి యిరవుదెలిసియు దెలియనియ్య డటుగాన

తలపోయ హరినీలదర్పణంబో ఇతడు వెలుగుచున్నాడు బహువిభవములతోడ
కలగుణంబటు వలెనెకాబోలు లోకంబు గలదెల్ల వెలిలోన గనిపించుగాన

మేరమీరిననీలమేఘమా యితడేమి భూరిసంపదలతో బొలయుచున్నాడు
కారుణ్యనిధియట్ల కాబోలు ప్రాణులకు కోరికలు దలపులో గురియు నటుగాన

తనివోని ఆకాశతత్త్వమో యితడేమి అనఘుడీ తిరువేంకటాద్రి వల్లభుడు
ఘనమూర్తి అటువలెనె కాబోలు సకలంబు తనయందె యణగి యుద్భవమందుగాన