వేవేలచందాల

వేవేలచందాల వాడు విఠలేశుడు భావించ నలవిగాని పరమాత్ముడితడు

సతతము రుక్మిణీ సత్యభామల నడుమ రతికెక్కిన సింగార రాయడు ఇతడు
చతురత సనకాది సంయమీంద్రుల మతి అతిశయిల్లేటి పరమానందమితడు

దేవతల కెల్లాను దిక్కు దెసై వెలుగొంది తావు కొన్నయట్టి యాధార మీతడు
మూవొంక గొల్లెతలు మున్ను సేసిన తపము కైవసమై ఫలించిన ఘనభాగ్య మితడు

వరముతో యశోద వసుదేవాదులకు పరగిన కన్నుల పండుగీతడు
సిరుల మించిన యట్టి శ్రీ వేంకటాద్రి మీది నిరతి దాసుల పాలి నిధాన మితడు