సతి చక్కదనమెంతో సరసుని మోహమెంతో చతురలింక సరి జూడరమ్మా
కాంత కన్నులు వ్రాసి కడలు వ్రాయగ రాక చింత తోడ దలవంచె జెలి విభుడు
పంతపు నడుము వ్రాసిబయలు వ్రాయగ రాక కొంత దడ వుస్సురనె గోమలి ప్రాణేశుడు
కలికి కుచాలు వ్రాసి కఠినము వ్రాయలేక తలపోయ దొడగె బంతపు విభుడు
నళినాక్షి మోము వ్రాసి నవ్వులు వ్రాయగరాక నిలువున వెరగందె నెలత రమణుడు
వనిత కౌగిట దన్ను వ్రశి రతి వ్రాయలేక తనువెల్ల మరచెను తమకమున
వెనక ముందర వ్రాసి వేడుక వ్రాయగరాక చినుకు జెమట వ్రాసె శ్రీవేంకటేశుడు
No comments:
Post a Comment