శ్రీహరిసేసినచిహ్నలివి

శ్రీహరిసేసినచిహ్నలివి యీ మోహము విడుచుట మోక్షమది

మలినంబేది మణుగననేది కలుషపుమలముల కాయమిది
కలిగినదేది కడులేందేది చలనపుమాయల జన్మమిది

తనిసినదేది తనియనిదేది దినదినమాకలి దీరదిది
కొనయిందేది గురిమొదలేది పనిగొనుకర్మపు బంధమిది 

నిండినదేది నిండనిదేది కొండలపొడపుల కోరికది
అండనే శ్రీ వేంకటాధిపు శరణని వుండుటె యిహపర యోగమది

శ్రీహరి నిత్యశేషగిరీశ

శ్రీహరి నిత్యశేషగిరీశ మోహనాకార ముకుంద నమో

దేవకీ సుత దేవ వామన గోవిందా గోప గోపీనాథా
గోవర్ధనధర గోకులపాలక దేవేశాధిక తే నమో నమో

సామాజావన శార్ణపాణి వామనా కృష్ణ వాసుదేవ
రామనామ నారాయణ విష్ణో దామోదర శ్రీధర నమో నమో

పురుషోత్తమ పుండరీకాక్ష గరుడధ్వజ కరుణానిధి
చిరంతన అచ్యుత శ్రీవేంకటేశ్వర నరమృగ తే నమో నమో

శ్రీశోయం సుస్థిరోయం

శ్రీశోయం సుస్థిరోయం కౌశికమఖరక్షకోయం

నిగమనిధినిర్మలోయం జగన్మోహనసతీపతి
విగత భయోయం విజయసఖోయం భృగుముని సంప్రీతోయం

సకలపతి శ్శాశ్వతోయం శుకముకమునిజనసులభోయం
ప్రకటబహుళశోభనాధికోయం వికచరుక్మిణీవీక్షణోయం

సరసోయం పరిసరప్రియోయం తిరువేంకటాధిపోయం
చిరంతనోయం చిదాత్మకోయం శరణాగతవత్సలోయం

శ్రీవేంకటేశుడు

శ్రీవేంకటేశుడు శ్రీపతియు నితడే పావనపువైకుంఠపతియును నితడే

భాగవతములో జెప్పే బలరాముతీర్థయాత్ర నాగమోక్తమైనదైవ మాత డితడే
బాగుగా బ్రహ్మాండపురాణపద్ధతియాత డితడే యోగమై వామనపురాణోక్తదైవ మీతడే

వెలయ సప్తఋషులు వెదకి ప్రదక్షిణము లలర జేసినదేవు డాత డీతడే
నెలవై కోనేటిపొంత నిత్యము గుమారస్వామి కలిమి దనముసేసి కన్నదేవు డీతడే

యెక్కువై బ్రహ్మాదులు నెప్పుడు నింద్రాదులు తక్కక కొలిచియున్న తత్త్వ మీతడే
చక్క నారదాదులసంకీర్తనకు జొక్కి నిక్కినశ్రీవేంకటాద్రినిలయుడు నీతడే

శ్రీమన్నారాయణ

శ్రీమన్నారాయణ శ్రీమన్నారాయణ శ్రీమన్నారాయణ నీ శ్రీపాదమే శరణు

కమలాసతీ ముఖకమల కమలహిత కమలప్రియ కమలేక్షణ
కమలాసనహిత గరుడగమన శ్రీ కమలనాభ నీపదకమలమే శరణు

పరమయోగిజన భాగధేయ శ్రీ పరమపూరుష పరాత్పర
పరమాత్మ పరమాణురూప శ్రీ తిరువేంకటగిరి దేవ శరణు


Download

శ్రీ వేంకటేశ్వరుని సింగారము

శ్రీ వేంకటేశ్వరుని సింగారము వర్ణించితే యే విధాన దలచిన యిన్నటికి దగును

కరిరాజు గాచిన చక్రము పట్టిన హస్తము కరి తుండమని చెప్పగా నమరును
వరములిచ్చేయట్టి వరద హస్తము కల్పతరు శాఖయని పొలుప దగు నీకును

జలధి బుట్టిన పాంచజన్య హస్తము నీకు జలధి తరగయని చాటవచ్చును
బలు కాళింగుని తోక పట్టిన కటి హస్తము పొలుపై ఫణీంద్రుడని పొగడగ దగును

నలిన హస్తంబుల నడుమనున్న నీయుర మలమేలు మంగ కిరవన దగును
బలు శ్రీ వేంకట గిరిపై నెలకొన్న నిన్ను నలరి శ్రీ వేంకటేశుడన దగును

శ్రీ వేంకటేశ రాజీవాక్ష

శ్రీ వేంకటేశ రాజీవాక్ష మేలుకొనవే వేగవేగ మేలుకొను వెలిఛాయ లమరే

సురలు గంధర్వ కిన్నరులెల్ల గూడి తంబురుశ్రుతులను జేర్చి సరవిగాను
అరుణోదయము దెలిసి హరిహరి యనుచు నర హరి నిన్ను దలచెదరు హంసస్వరూప

అల చిలుక పలుకులకు నధరబింబము బోలె తెలివి దిక్కుల మిగుల తేట బారే
అలరు కుచగిరుల నుదయాస్త్రాదిపై వెలిగె మలినములు తొలగ నిదో మంచు తెరవిచ్చే

తళుకొత్త నిందిరా తాటంకరైరుచుల వెలిగన్ను తామరలు వికసింపగాను
అలర్మేల్ మంగ శ్రీవేంకటాచలరమణ చెలువు మీఱగను ముఖకళలు గనవచ్చే

శోభనమే శోభనమే

శోభనమే శోభనమే వైభవముల పావన మూర్తికి

అరుదుగ మును నరకాసురుడు సిరులతో జెరలు దెచ్చిన సతుల
పరువపు వయసుల బదారు వేలను సొరిది బెండ్లాడిన సుముఖునికి

చెందిన వేడుక శిశుపాలుడు అంది పెండ్లాడగ నవగళించి
విందువలెనె తా విచ్చేసి రుకుమిణి సందడి బెండ్లాడిన సరసునుకి

దేవదానవుల ధీరతను దావతిపడి వార్థి దరుపగను
శ్రీ వనితామణి జెలగి పెండ్లాడిన శ్రీ వేంకటగిరి శ్రీనిధికి

శరణువేడెద యజ్ఞసంభవ

శరణువేడెద యజ్ఞసంభవ శ్రీరామ అరసి రక్షించుము అయోధ్యారామ

రావణనుని భంజించిన రాఘవ రామ వావిరి విభీషణ వరద శ్రీరామ
సేవనలమేల్మంగతో వేంకటేశుడై ఈవల దాసుల ఏలినట్టి శ్రీరామ

ధారుణిలో దశరథ తనయ రామ చేరిన యహల్యను రక్షించిన రామ
వారిధి బంధన కపి వల్లభ రామ తారక బ్రహ్మమైన సీతాపతి రామ

ఆదిత్య కులాంబుధి మృగాంక రామ హర కోదండ భంజనము చేకొనిన రామ
వేద శాస్త్ర పురాణాది వినుత రామ ఆది గొన్నతాటకా సంహార రామ

శరణు శరణు సురేంద్ర

శరణు శరణు సురేంద్ర సన్నుత శరణు శ్రీసతి వల్లభా శరణు రాక్షస గర్వ సంహర శరణు వెంకటనాయకా

కమలధరుడును కమలమిత్రుడు కమలశత్రుడు పుత్రుడు
క్రమముతో మీకొలువు కిప్పుడు కాచినా రెచ్చరికయా

అనిమిషేంద్రులు మునులు దిక్పతులమర కిన్నర సిద్ధులు
ఘనతతో రంభాదికాంతలు కాచినా రెచ్చరికయా

ఎన్నగల ప్రహ్లాద ముఖ్యులు నిన్ను గొలువగ వచ్చిరీ
విన్నపము వినవయ్య తిరుపతి వేంకటాచలనాయకా

శరణు శరణు వేద

శరణు శరణు వేద శాస్త్రనిపుణ నీకు అరుదైన రామ కార్యదురంధరా

హనుమంతరాయ అంజనాతనయా ఘనవాయుసుత దివ్యకామరూప
అనుపమలంకాదహన వార్ధిలంఘన జనసురనుత కలశాపురనివాస

రవితనయస చివ రావణవనాపహార పవనవేగబలాఢ్య భక్తసులభ
భువనపూర్ణదేహా బుధ్ధివిశారద జవసత్వవేగ కలశాపురనివాస

సీతాశోకనాశన సంజీవశైలాకర్షణ ఆతతప్రతాపశౌర్యా అసురాంతకా
కౌతుక శ్రీవేంకటేశు కరుణాసమేత సాతకుంభవర్ణ కలశాపురనివాస

శరణు శరణు విభీషణ

శరణు శరణు విభీషణ వరదా శరధిబంధన రామ సర్వగుణస్తోమ

మారీచసుబాహుమదమర్దన తాటకాహర కౄరేంద్రజిత్తులగుండుగండా
దారుణకుంభకర్ణదనుజ శిరచ్ఛేదక వీరప్రతాపరామ విజయాభిరామ

వాలినిగ్రహ సుగ్రీవరాజ్యస్థాపక లాలితవానరబల లంకాపహార
పాలితసవనాహల్యపాపవిమోచక పౌలస్త్యహరణ రామ బహుదివ్యనామ

శంకరచాపభంజక జానకీమనోహర పంకజాక్ష సాకేతపట్టణాధీశ
అంకితబిరుద శ్రీవేంకటాద్రినివాస ఓంకారరూప రామ వురుసత్యకామ

శరణు శరణు రామచంద్ర

శరణు శరణు రామచంద్ర నరేంద్రా సరి మమ్ముగావు రామచంద్రా నరేంద్రా

ఘన దశరథునకు కౌసల్యాదేవికిని జననమందిన రామచంద్రా నరేంద్రా
కనలి తాటకి చంపి కౌశుకుజన్నము గాచి చనవులిచ్చిన రామచంద్రా నరేంద్రా

అరిది సీత పెండ్లాడి అభయమందరికిచ్చి శరధిగట్టిన రామచంద్రా నరేంద్రా
అరసి రావణు చంపి అయేధ్యానగర మేలి సరవినేలిన రామచంద్రా నరేంద్రా

పన్నుగ నలమేల్మంగపతి శ్రీవేంకటేశ్వరు సన్నిధినిల్చిన రామచంద్రా నరేంద్రా
అన్నిటా లక్ష్మణభరతాంజనేయశత్రుఘ్నుల సన్నుతికెక్కిన రామచంద్రా నరేంద్రా

శరణు కపీశ్వర

శరణు కపీశ్వర శరణం బనిలజ సరవి నెంచ నీసరి యిక వేరీ

పుట్టిననాడే భువనములెరగగ పట్టితి సూర్యుని పండనుచు
ముట్టిన చుక్కలు మోవగ పెరిగితి ఇట్టిప్రతాపివి యెదురేదయ్యా

అంపినయప్పుడే యంబుధి దాటితివి ఇంపులు సీతకు నిచ్చితివి
సంపద మెరయుచు సంజీవి దెచ్చితి పెంపును సొంపును పేర్కొనవశమా

చెదరక నేడే శ్రీవేంకటగిరి గదిసి రాముకృప గైకొంటి
వదలక నీకృపవాడనైతి నిదె యెదుటనే కాచితి విక కడమేమీ


Download

శరణాగత వజ్ర

శరణాగత వజ్ర పంజరుడితడు చక్రధరుడు అసుర సంహారుడు వెరవుతోడ తను శరణనువారికి వెనుబలమీతడే రక్షకుడు

అంతరాత్మ శ్రీ వేంకటేశ్వరుడు అన్యము భజించ చోటేది ఇంతట నమ్మక దేవతాంతరము లేటేటివొ మరి చెప్పుదురు
ఎంతలేదు ప్రాకృత జనముల భ్రమ ఎవ్వరి కాదన నేమిటికి ఇంతకు శ్రీ వేంకటేశు దాసుల ఈతడే మాకిక రక్షకుడు

శ్రీపతి దిక్కై కావగ జేరని సంపద లికనేవి దాపల బుద్ధుల నది నమ్మక విచ్చలవిడి నోములు చెప్పుదురు
తీపులు పుట్టించి యెవ్వ రేమనిన తెలిపి వాదడువ నేమిటికి శ్రీపతి గొలిచితి చేరె సంపదలు జిగినితడే మా రక్షకుడు

శరణంబితడే

శరణంబితడే సకలము నాకును వెరవున మనసా వెతకవో ఇతని

అభయంబొసగెడి యతడెవ్వడు మును ఇభరక్షకుడు అతడెవ్వడు
ఉభయవిభూతుల కొడయండెవడూ ప్రభువితడే నాపాలి దేవుడు

శరణాగతులకు సరి దా నెవ్వడు యిరవుగ శ్రీపతి యెవ్వడు
అరి దుష్ట దైత్య హంతకు డెవ్వడు పరమును నతడె నాపాలి దేవుడు

ఆది శంఖ చక్రాయుధు డెవ్వడు యేదెస పూర్ణు డెవ్వడు
వేదమయుడు శ్రీ వేంకట పతియై పాదాయ నిదె నా పాలిదేవుడు

శరణంటి

శరణంటి మాతనిసమ్మంధమున మరిగించి మమునేలి మన్నించవే

సకలవేదములు సంకీర్తనలు చేసి ప్రకటించి నిను బాడి పావనుడైన
అకలంకుడు తాళ్ళపాకన్నమాచార్యుల వెకలియై యేలిన శ్రీవేంకటనిలయ

నారదాది సనకసనందనాదులవలె పేరుపడి నిన్ను బాడి పెద్దలైనట్టి
ఆరీతి దాళ్ళపాకన్నమాచార్యుల చేరి యేలినయట్టి శ్రీ వేంకటనిలయ

సామవేదసామగానసప్తస్వరములను బాముతో నీసతి నిన్ను బాడినయట్టి
ఆముకొన్న తాళ్ళపాకన్నమాచరుల వేమరు మెచ్చిన శ్రీ వేంకటనిలయా

శతాపరాధములు

శతాపరాధములు సహస్రదండన లేదు గతి నీవని వుండగ కావకుండగారాదు

తలచి నీకు మొక్కగా దయజూడకుండరాదు కొలిచి బంటుననగా కోపించరాదు
నిలిచి భయస్తుడనై నీయెదుట దైన్యమే పలుక గావకుండ బాడిగాదు నీకు

శరణు చొరగ నీకు సారె నాజ్ఞ వెట్టరాదు సరి బూరి గరవగ చంపరాదు
అరయ జగద్రోహినౌదు నైనా నీనామము గరిమె నుచ్చరించగ గరగక పోదు

దిక్కు నీవని నమ్మగా దిగవిడువగరాదు యెక్కువ నీలెంకగాగా యేమనరాదు
తక్కక శ్రీవేంకటేశ తప్పులెల్లా జేసి వచ్చి యిక్కడ నీదాసినైతి నింక దోయరాదు