దోమటి వింతెరుగరా

దోమటి వింతెరుగరా తొల్లిటివారు వామదేవవసిష్ఠవ్యాసాదులు

తానే దైవమైతే తపమేల జపమేల పూని సారె బూజించేపూజలేల
కూనువంగి యింటింట గోరనేల వేడనేల యీనెపాన లోకమెల్లా నేలరాదా తాను

తగ దా స్వతంతుడైతే దరిద్రదుఃఖములేల నొగలి వ్యాధులచేత నొవ్వనేల
నగుబాటులైన జననమరణములేల ముగురువేల్పులదండ మొనచూపరాదా

శ్రీ వేంకటేశుడే శేఖరపుదైవమని సావధాను డితనికి శరణుజొచ్చి
భావములోపల దనపాపబంధములు బాసి తావుల నాతనికృప దండ చేరరాదా

దొరతో సంగాతము

దొరతో సంగాతము దొరికిన పాటే చాలు వొరసి మీరగ బోతే నొక్కరీతి నుండునా

యేకతాన లోన నుండి యేలనన్ను బిలిచేవు వాకిటికి రావయ్యా వలసితేను
చేకొని యొకతె యుంటె సిగ్గువడి వెళ్ళి వచ్చి కూకులు వత్తులుగాను కూళదాననా

మరగించి మరగున మాట లేలాడించేవు తెఅదియ్యవయ్య అంత తీట గలిగితె
వరుసకు వచ్చి నాపె వాదు నాతో బెట్టుకొంటె విరసమై యూరకుండ వెఱ్ఱిదాననా

పట్టె మంచముపై నుండి పైగాలు చాచనేల యిట్టె వుర మెక్కవయ్య యింత గలిగె
జట్టిగా శ్రీ వేంకటేశ సరినొకతె గూచుంటె వట్టి యితవు సేసుకో వాసిలేని దాననా

దొరకెగా పూజ

దొరకెగా పూజ కందువ పూజ నీ విరహపు తనుతావి విరవాది పూజ

కలికి నీ కనుచూపు కలువరేకుల పూజ లలన నీ నగవు మొల్లల పూజ
తలపోత చింత చిత్తపు గమలపు పూజ చలివేడి వూర్పు నీ సంపంగి పూజ

కనుల జెక్కిన జేయి కరపల్లవపు పూజ తను పులకలు జాజి ననల పూజ
తనరు నీ వలపులు దొంతర పూవుల పూజ యెనయు జెమట మల్లె మొగ్గల పూజ

చెనకు నీగోళ్ళే చిరి గేదగుల పూజ గునియు గుబ్బలు పూవు గుత్తుల పూజ
ఘనతమై గూడి వేంకటపతి మోము సోకిన నీదు మోవి మంకెన పూవు పూజ

దొరకె మాపాలికి

దొరకె మాపాలికి గందువయర్థము దరిదాపైయుండినతత్వార్థము

తిరముగ నల్లదీవి దెచ్చినయర్థ మిదివో విరజవోడరేవున వెళ్ళినర్థము
పరమభాగవతులు పాతినర్థ మిదివో పురుషోత్తముడనేటిపురుషార్థము

చందపువేదముల శసనము వేసినర్థము ముందు సముద్రలకెల్లా మొదలర్థము
అందరియాత్మలనేటిఅంగళ్ళలోనియర్థము యెందు సహస్రనామపుటెన్నికర్థము

కొలచి బ్రహ్మాండముల కొప్పెరలోనర్థము యిల నిహపరముల కెక్కినర్థము
యెలమి హీనునినైన యెక్కుడుసేసేయర్థము అలరి శ్రీవేంకటేశుడైనయర్థము

దొరకునా యితనికృప

దొరకునా యితనికృప తుదిపదంబు అరిదివిభవము లొల్లమనినా బొదలు

సొంపలర నితడు కృపజూచు టరుదనికాక యింపు సామాన్యమా యితనికరుణ
లంటమైనఘనమైన లక్ష్మీకటాక్షములు సంపదలు తోడనే చల్లువెదలాడు

తగ నితనిపై భక్తి తగులు టరుదనికాక నగుట సామాన్యమా ననిచి యితడు
జగదేకహితములుగ సరసతలు సౌఖ్యములు దిగులువాయగ నితడు దిప్పు దీరాడు

తిరువేంకటాద్రి సిద్ధించు టరుదనికాక మరుగ దను నిచ్చునా మరియొకరిని
యిరవైన భోగములు యిష్టసామ్రాజ్యములు విరివిగొని యితనిదయవెంటనే తిరుగు

దైవము పుట్టించినట్టి

దైవము పుట్టించినట్టి తనసహజమే కాక కోవిదునికైనా జాలిగుణమేల విడుచు

ఆరయ బంచదార నద్దుక తినబోతే చేరరానిముష్టిగింజ చేదేల మాను
సారమైన చదువులు సారె సారె జదివినా గోరపుదుష్టునికి కోపమేల మాను

నిప్పు దెచ్చి వొడిలోన నియమాన బెట్టుకొంటే యెప్పుడును రాజుగాక యిది యేల మాను
ముప్పిరి బాతకుడైనమూఢు డెన్నియాచారాలు తప్ప కెంతసేసినాను దయయేల కలుగు

యింటిలోన గొక్కు దెచ్చి యిరవుగ బెట్టుకొంటే దంటయై గోడలు పడదవ్వ కేలమాను
గొంటరై శ్రీవేంకటేశు గొలువకుండినవాడు తొంటిసంసారవుగాక దొర యేటికౌను

దైవము నీవే

దైవము నీవే యిక దరి చేరుతువుగాక జీవులవసము గాదు చిక్కిరి లోలోననే

పుట్టుట సహజ మిది పొదలేజీవులకెల్ల గట్టిగా జగమునందు కలకాలము
నట్టేటివరదవలె నానాటినీమాయ కొట్టుక పారగజొచ్చె కూడినవిజ్ఞానము

పాపమే సహజము బద్దసంసారులకెల్ల కాపురపువిధులలో కలకాలము
తేపలేనిసముద్రమురెరగున కర్మమెల్లా మాపురేపు ముంచజొచ్చె మతిలోనిధైర్యము

లంపటమే సహజము లలి దేహధారులకు గంపమోపు కోరికెలకలకాలము
యింపుల శ్రీవేంకటేశ ఇదె నీదాసులని పంపుసేసి బ్రదికించె ప్రపన్నసుగతి

దైవమా పరదైవమా

దైవమా పరదైవమా యేవగింతలు నాకు నెట్టు దెచ్చేవో

పాపకర్ముని దెచ్చి పరమియ్యదలచిన మేపులకే పోక మెయికొనీనా
తీపులు రూపులు దివిరి నావెనువెంట నేపొద్దు నీవేడ దెచ్చేవో

అధమాధముని దెచ్చి యధికుని జేసేనంటే విధినిషేధములు వివరించునా
నిధినిధానములు నిచ్చనిచ్చలు బెక్కు విధముల నెటువలె వెదచల్లెదవో

అతికష్టుడగునాకు నలవిగానియీ మత మొసగిన నేను మరిగేనా
ప్రతిలేని వేంకటపతి నీదునామా మృత మిచ్చి నను నీవే మెరయింతుగాక

దైవమా నీమాయ

దైవమా నీమాయ తామొలెఱగనీదు కావరపువిషయాలకట్లు వదలవు

గక్కున బెరిగివచ్చీ కాలము మీదమీద వొక్కనాటికొక్కనాటి కొత్తు కొత్తుక
నిక్కి తుమ్మిదలవంటినెరులెల్లా దెల్లనాయ కక్కరమాయ మేను కాంక్షలూ నుడుగవు

చిన్ననాడుమోహించినచెలులు నేజూడగానే పన్నినవయసుమీరి ప్రౌడలైరి
వన్నెకుబెట్టినసొమ్ము వడి రాసి యెత్తుదీసె మున్నిటివే వెనకాయ ముచ్చటా దొలగదు

సిగ్గులెల్లా బెడబాసె చేరి యవ్వరు నవ్వినా యెగ్గుపట్టదు మనసు యెఱుకతోనే
నిగ్గులశ్రీవేంకటేశ నీవు నన్ను నేలుకొని దగ్గరి నాలోనుండగా తలపూగైవాలదు

దైవమా నీకు

దైవమా నీకు వెలితా తలపువెలితేకాక వేవేలు కర్మల వేసారగవలనె

హరియంటే బాపేటి అన్నిపాపాలు సేసిన పొరినందుపై నమ్మిక పుట్టుదుగాక
నరసింహాయంటే వచ్చే నానాపుణ్యాలకు తిరముగా ఋణములు దీర్చుకొనగలనా

దేవ జగన్నాథయంటే తెగనిజన్మములేవి కైవశము నామనసు గాదుగాక
గోవిందయనియంటే గూడని పదవులేవి కావిరిగాలమూరకె కడపేము నేము

వేదనారాయణయంటే వీడేటి బంధములు ఆదిగా మూడులోకాలనైనా నున్నదా
శ్రీదేవిపతియైన శ్రీవేంకటేశ్వరుడా యేదెసా నీవే నన్ను యీడేర్తువుగాక

దైవక్రుతమెవ్వరికి

దైవక్రుతమెవ్వరికి దప్పింపరాదనుచు భావించి జనులాడుపలుకు నిజమాయ

కందునకు బెడబాసి చందురుదింతి ముఖ్హ చందురుడైన నది అందును గలిగె
కందువగు చెలినొసలి కస్తూరి తిలకమను కందు ముఖ్హచంద్రునకుగడు నందమాయ

జలజములు శశిచేత నులికి యీకాంతకుచ జలజంబులైన నది సరుసనే కలిగె
లలితమగు ప్రాణవల్లభుని సురతాంకమున విలువనేయగరాని విదియ చందురులు

తీగె బహుజలజములకు దెమలి కామినిమేను దీగె యయ్యిన నదియుదిరుగ మరికలిగె
ఈ గతుల దిరువేంకటేశ్వరుని సమసురత యోగంబు వలన ఘ్హర్మోదకశ్రీలు

దైవకృతంబట

దైవకృతంబట చేతట తనకర్మాధీనంబట కావలసినసౌఖ్యంబులు గలుగక మానీనా

ఎక్కడిదుఃఖపరంపర లెక్కడిసంసారంబులు యెక్కడిజన్మము ప్రాణులకేలా కలిగినది
యెక్కడిమోహవిడంబన యెక్కడియాశబంధము యెక్కడికెక్కడ నిజమై యివి దానుండీనా

యీకాంతలు నీద్రవ్యము లీకన్నులవెడయాసలు యీకోరికె లీతలపులు యిట్టే వుండీనా
యీకాయం బస్థిరమన కీదుర్దశలకు లోనై యీకల్మషముల బొరలగ నివి గడతేరీనా

దేవశిఖామణి తిరుమల దేవునికృపగల చిత్తము పావనమై దురితంబుల బాయక మానీనా
ఆవిభుకరుణారసమున నతడే తను మన్నించిన ఆవేడుక లీవేడుక లాసలు సేసీనా

దేహినిత్యుడు

దేహినిత్యుడు దేహము లనిత్యాలు యిహల నా మనసా యిది మరువకుమీ

గిది బాతచీరమాని కొత్త చీరగట్టినట్టు ముదిమేను మాని దేహముమొగి గొత్తమేను మోచు
అదన జంపగలేవు ఆయుధము లితని గదసి యగ్నియు నీరు గాలి జంపగ లేవు

ఈతడు నరకు వడ డీతడగ్ని గాలడు యీతడు నీటమునుగ డీతడు గాలిబోడు
చేతనుడై సర్వగతుండొఊ చెలియించ డేమిటను యీతల ననాది యీ తడిరపు గదలడు

దేహము దా నస్థిరమట

దేహము దా నస్థిరమట దేహి చిరంతనుడౌనట దేహపుమోహపుసేతలు తీరుట లెన్నడొకో

కన్నుల బుట్టినకాంక్షలు కప్పికదా దుర్బోధల కన్నులు మనసును దనియక గాసిబడిరి జనులు
తన్నిక నెరుగుట లెన్నడు తలపుల దొలగుట లెన్నడు తిన్ననిపరవశములచే దిరుగుట లెన్నడొకో

సిగ్గులుదొలగనియాశల జిక్కికదా దుర్మానపు సిగ్గులయెగ్గులచేతను చిక్కువడిరి జనులు
సిగ్గులు దొలగుట యెన్నడు చిత్తములోనౌటెన్నడు తగ్గులమొగ్గులసేతలు తలగుట లెన్నడొకో

మనసునబుట్టినయాతడు మనసున బెనగొని తిరుగగ మనసే తానగుదైవము మరచిరి యందరును
అనయము తిరువేంకటపతి యాత్మ దలచి సుఖింపుచు ఘనమగు పరమానందము కలుగుట లెన్నడొకో

దేవునికి దేవికిని

దేవునికి దేవికిని తెప్పల కోనేటమ్మ వేవేల మొక్కులు లోకపావని నీకమ్మా

ధర్మార్థకామ మోక్షతతులు నీ సోపానాలు అర్మిలి నాలుగువేదాలదె నీ దరులు
నిర్మలపు నీ జలము నిండు సప్తసాగరాలు కూర్మము నీ లోతు వోకోనేరమ్మా

తగని గంగాది తీర్థమ్ములు నీకడళ్ళు జగతి దేవతలు నీ జల జంతును
గగనపు బుణ్యలోకాలు నీ దరిమేడలు మొగి నీచుట్టు మాకులు మునులోయమ్మా

వైకుంఠ నగరము వాకిలే నీ యాకారము చేకొను పుణ్యములే నీ జీవభావము
యేకడను శ్రీ వేంకటేశుడే నీ వునికి దీకొని నీ తీర్థమాడితిమి కావవమ్మా

దేవుడుగలవారికి

దేవుడుగలవారికి దిగులు జింతయు లేదు శ్రీవిభుడే అన్నిటా రక్షించుగనక

యేలికగలబంటుకు యేవిచారములేదు వోలి మగడుగలాలికి వొప్పమి లేదు
పోళిమి దండ్రిగలపుత్రుని కంగద లేదు మేలుగా బండినభూమికి గరవులేదు

బలముగలరాజుకు భయమేమియు లేదు కలిమిగలవాని కక్కర లేదు
యిల నాచారవంతుని కేపాపమును లేదు తలపుబుణ్యముగల ఆతనికి జేటు లేదు

గురువుగలవానికి గొఱత యేమియు లేదు పరముగలవానికి భ్రాంతులు లేవు
యిరవై శ్రీవేంకటేశు డిన్నిటా మాకు గలడు అరయ దాసులము మా కడ్డాకే లేదు

దేవశిఖామణివి

దేవశిఖామణివి దిష్టదైవమవు నీవు ఈవల నీబంట నాకు నెదురింక ఏది

కామధేనువు పిదుకగల కోరికెలివెల్ల కామధేనువులు పెక్కుగాచే కృష్ణుడవట
కామించి నీ బంటనట కమ్మినిన్ను దలచితి ఏమి మాకు కడమయ్యా ఇందిరా రమణ

ఎంచ కల్పవృక్షమును ఇచ్చు సిరులెల్లాను మించి కల్పవృక్షముల నీడలా కృష్ణుడవట
అంచల నీ బంటనట ఆత్మలొ నిను నమ్మితి వంచించ కడమయేది వసుధాధీశ

తగనొక్క చింతామణి తలచినట్లచేసు మిగుల కౌస్తుభమణి మించినా కృష్ణుడవట
పగటు శ్రీవేంకటేశ భక్తుడ నీకట నేను జగములో కొరతేది జగదేకవిభుడ

దేవశిఖామణి

దేవశిఖామణి దివిజులు వొగడగ వేవేలు గతుల వెలసీ వాడే

వీధుల వీధుల వెసతురగముపై భేదిల బల్లెము బిరబిర దిప్పుచు
మోదము తోడుత మోహన మూరితి ఏ దెస జూచిన నేగీ వాడే

కన్నులు దిప్పుచు కర్ణములు కదల సన్నల రాగెకు చౌకళింపుచును
అన్నిటా తేజియాడగ దేవుడు తిన్నగ వాగేలు తిప్పీవాడే

వలగొని దిరుగుచు వాలము విసరుచు నిలిచి గుఱ్ఱమటు నేర్పులు చూపగ
బలు శ్రీ వేంకటపతి అహోబలపు పొలమున సారెకు పొదలీవాడే

దేవరగుణములు

దేవరగుణములు దెలియవు నీవే మాకును నేరుప వయ్యా

వదలక నీతో వాసికి బెనగిన యెదుటనె నీ మన సెట్టుండునో
కదిసి నీరీతికి గడు దమకించిన యిది వేసాలని యెంతువో నీవు

చెనకగ నీ యెడ సిగ్గులు నెరపిన పనులవి యేమని భావింతువో
ననిచి నీ యెదుట నవ్వులు నవ్విన తనివి లేనిదని తగ నాడుదువో

కూడుదు నిన్నిట గుబ్బల నొత్తిన వోడ దనుచు గో రూదుదువో
యీడనె శ్రీ వేంకటేశ యేలితివి వీడెమిచ్చితే వెరగందుదువో

దేవర చిత్తం

దేవర చిత్తం దివ్య నిధి దేవనిర్మిత నిధీ యవధానం

అతివలు నాట్యంబాడెదమని వున్నతి మెఅయుచు నున్నారిదివో
ప్రతినలతో రంధయు మేనకయును ధ్రుతి విద్య తమకంబున వినుమని

గానవిద్య తమకంబున వినుమని కానుకలివె సురకాంతలవి
కానుపించుకో గంధర్వ సతులను ధీనుత పంపుసుధీ యవధానం

పరియంకంబున బవళించెదవో సిరుల విభవముల జెలగెదవో
తిరువేంకటగిరిదేవ యన్నిటా తిరమందితి విటు ధీ యవధానం