ఓహో డేండేం

ఓహో డేండేం వొగి బ్రహ్మ మిదియని సాహసమున శ్రుతి దాటెడిని

పరమున నరము బ్రకృతియు ననగా వెరవుదెలియుటే వివేకము
పరము దేవుడును అపరము జీవుడు తిరమైన ప్రకృతియె దేహము

జ్ఞానము జ్ఞేయము జ్ఞానగమ్యమును పూని తెలియుటే యోగము
జ్ఞానము దేహాత్మ జ్ఞేయము పరమాత్మ జ్ఞానగమ్యమే సాధించుమనసు

క్షరము నక్షరమును సాక్షి పురుషుడని సరవి దెలియుటే సాత్వికము
క్షరము ప్రపంచ మక్షరము కూటస్థుడు సిరిపురుషోత్తముడే శ్రీ వేంకటేశుడు

ఓరుపే నేరుపు

ఓరుపే నేరుపు సుమ్మీ వువిదలకు మారుకోకు మగవాని మనసు మెత్తనిది

చలము సంపాదించవద్దు చనవే మెఱయవే చెలువుడాతడే నీచేత జిక్కీని
బలములు చూపవద్దు పకపక నగవే అలరిన జాణతనమందులోనే వున్నది

పగలు చాటగవద్దు పైకొని మెలగవే సొగసి ఆతడే నీ సొమ్మై వుండీనీ
తగవుల బెట్టవద్దు తమకము చూపవే అగపడ్డ నీ పంతములందులోనే వున్నవి

మొక్కల మేమియు నొద్దు మోహములు చల్లవే నిక్కి శ్రీ వేంకటేశుడు నిన్ను గూడెను
తక్కల బెట్టగవొద్దు దయలు దలచవే అక్కజపు నీ రతులు అందులోనే వున్నవి

ఓరుచుకోవే

ఓరుచుకోవే యెట్టయినా వువిద నీవు నేరుపరి నీ విభుడు నేడే వచ్చీ నీడకు

కలువల వేసితేనే కాముడు చుట్టము గాడా వెలయు విరహులకు వెగటు గాక
చలివెన్నెల గాసితే చందురుడు పగవాడా పొలయలు కలవారే పొగడరుగాక

కొసరుచు బాడితేనే కోయిల గుండె బెదరా అసదు విరహులు కాదందురు గాక
ముసరితే దుమ్మిద మూకలు దయలేనివా విసిగిన కాముకులే వినలేరు గాక

వనము సింగారించితే వసంతుడు కౄరుడా వొనరని విరహుల కొంటదుగాక
యెనసి శ్రీ వేంకటేశుడేలె నిన్ను చిలుకలు కినిసేనా పాంథులకు కేరడముగాక

ఓయమ్మా

ఓయమ్మా ఇంతయేల వొద్దనరే నాయముగాదిందరిలో నగుబాటు తనకును

చెక్కునొక్కితిని సెలవి నవ్వితిని మక్కువతో నెంతైనా మాటాడడు
మొక్కూ మొక్కితిని మోనాన నుండితిని యెక్కుడు దిట్టితినంటా నెగ్గువట్టీ నితడు

ఇచ్చకము జేసితి ఇచ్చితి విడెమును కచ్చుపెట్టి యెంతైనా కరగడు
ముచ్చటలాడితిని మోవిజూచితి తన్ను బచ్చిగా జేసితినంటా పగచాటీ నితడు

కన్నులా జొక్కితిని కాగిటా నించితిని మన్నించె రతినెంతైనా మానడు
సన్నల మెచ్చితిని చాయల హెచ్చితిని ఇన్నిటా శ్రీవేంకటేశు డెంతజాణే ఇతడు

ఓ పవనాత్మజ

ఓ పవనాత్మజ ఓ ఘనుడా బాపు బాపనగా పరిగితిగా

ఓ హనుమంతుడ ఉదయాచల నిర్వాహక నిజ సర్వ ప్రబలా
దేహము మోచిన తెగువకు నిటువలె సాహస మిటువలె చాటితిగా

ఓ రవి గ్రహణ ఓదనుజాంతక మారులేక మతి మలసితిగా
దారుణపు వినతా తనయాదులు గారవింప నిటు కలిగితిగా

ఓ దశముఖ హర ఓ వేంకటపతి పాదసరోరుహ పాలకుడా
ఈ దేహముతో ఇన్నిలోకములు నీదేహమెక్క నిలిచితిగా