నీమహత్త్వంబు

నీమహత్త్వంబు లోనికి వెలుపలికి గప్పి కామింప నిట్టిదని కానారా దటుగాన

నిండి యిన్నిటిలోన నీవు గలవని భ్రాంతి నుండుదువుగాని నీ వొకటియును గావు
దండిగలగిరి ప్రతిధ్వని దోచుగాని యది కొండలోపల లేదు కొండయును గాదు

బలసి యిన్నిటిలోపలను జైతన్యమై మెలగుదువుగాని యేమిట నీవు లేవు
పలుదెరగులైన దర్పణమునం దొకనీడ వొలయుగాకందు దలపోయ నదిలేదు

వుడుగకన్నిటిలోన నుండుటయు లేదు నీ వుడివోయి యందుండకుండుటయు లేదు
చెడనితేజముగాన శ్రీవేంకటేశ నీ పొడవు పరిపూర్ణమై పొలుపొందు