ఎంత చదివి చూచిన నీతడే ఘనముగాక యింతయు నేలేటిదైవ మిక వేరే కలరా
మొదల జగములకు మూలమైనవాడు తుద ప్రళయమునాడు తోచేవాడు
కదిసి నడుమ నిండి కలిగివుండెడివాడు మదనగురుడేకాక మఱి వేరే కలరా
పరమాణువైనవాడు బ్రహ్మాండమైనవాడు సురలకు నరులకు జోటయినవాడు
పరమైనవాడు ప్రపంచమైనవాడు హరి యొక్కడేకాక అవ్వలను గలరా
పుట్టుగులయినవాడు భోగమోక్షాలైనవాడు యెట్టనెదుర లోనను యిన్నిటివాడు
గట్టిగా శ్రీ వేంకటాద్రి కమలాదేవితోడి పట్టపుదేవుడేకాక పరులిక గలరా
No comments:
Post a Comment