నీదాసుల భంగములు

నీదాసుల భంగములు నీవుజూతురా ఏదని జూచేవు నీకు నెచ్చరించవలెనా

పాల సముద్రము మీద పవ్వళించ్చినట్టి నీకు బేలలై సురలు మొరవెట్టిన యట్టు
వేళతో మామనువులు విన్నవించితిమి నీకు ఏల నిద్దిరించేవు మమ్మిట్టే రక్షించరాద

ద్వారకా నగరములో తగ నెత్తమాడే నీకు బిరాన ద్రౌపది మొరవెట్టిన యట్టు
ఘోరపు రాజసభల కుంది విన్నవించితిమి ఏరీతి పరాకు నీకు నింక రక్షించరాద

ఎనసి వైకుంఠములో నిందిర గూడున్న నీకు పెనగి గజము మొరవెట్టిన యట్టు
చనువుతో మాకోరికె సారె విన్నవించితిమి విని శ్రీవేంకటేశుండ వేగ రక్షించరాద